Mae EMRTS yn parhau i gryfhau rheolaeth argyfyngau mamolaeth

Mae EMRTS wedi parhau â'i gydweithrediad â PROMPT Cymru i gryfhau'r broses o gydnabod a rheoli argyfyngau mamolaeth yn y lleoliad cyn-ysbyty.

Yn ddiweddar, cyflwynwyd Hyfforddiant Ymarferol Aml-Broffesiynol Obstetreg (PROMPT Cymru) yng nghanolfannau Ambiwlans Awyr Cymru yng Nghaernarfon a Dafen, gan ddod â chlinigwyr EMRTS, bydwragedd a staff aml-broffesiynol ynghyd i ymarfer senarios brys, ffactorau dynol a gwneud penderfyniadau clinigol mewn argyfyngau mamolaeth. Nod hyfforddiant PROMPT Cymru yw gwella canlyniadau i fenywod a babanod trwy ddysgu aml-broffesiynol, gwaith tîm a chyfathrebu, ac mae'n cael ei ariannu a'i gydlynu gan Gronfa Risg Cymru.

Dywedodd Sara Jelfs, Bydwraig a Chynghorydd Diogelwch a Dysgu gyda Chronfa Risg Cymru: “Mae wedi bod yn wych parhau i ddatblygu’r cydweithrediad hwn gydag EMRTS a gweld timau’n dysgu gyda’i gilydd mewn amgylchedd aml-broffesiynol mor gefnogol i gryfhau cydnabyddiaeth a rheolaeth argyfyngau mamolaeth yn y lleoliad cyn-ysbyty. Mae’r adborth o’r hyfforddiant wedi bod yn hynod gadarnhaol, gyda chyfranogwyr yn tynnu sylw at werth dysgu ymarferol, ffactorau dynol, gwaith tîm a defnyddio algorithmau i gefnogi gwneud penderfyniadau o dan bwysau. Roedd yn arbennig o galonogol gweld y gwelliant mewn hyder yn dilyn yr hyfforddiant, gan atgyfnerthu gwerth efelychu ffyddlondeb uchel wrth gryfhau gofal perinatal cyn-ysbyty a gwella canlyniadau i bobl a babanod sy’n rhoi genedigaeth ledled Cymru.”

Ychwanegodd Arweinydd Addysg a Hyfforddiant Ymarferwyr Gofal Critigol EMRTS, Kate Humphries: “Rydym yn gwerthfawrogi cefnogaeth a gwybodaeth arbenigol tîm PROMPT Cymru yn fawr, ac yn ddiolchgar iddynt am rannu eu harbenigedd gyda ni. Yn y pen draw, mae hyn yn arwain at well triniaeth a chanlyniadau i’n cleifion obstetreg yng Nghymru.